Trooßdoorfer Platt

Trooßdoorfer Platt witt wie dä Name ad säät in Troosdoorf jesproche. Dobei muß me allerdingens sage, dat dat reine Trooßdoorfer Platt och nur en Trooßdoorf Midde jesproche witt. Die andere Shtadtdeeil han zum Deeil en mieh oder weenijer avvjewandelte Version dovun. Dat häät natürlich historische Jründ.

Wen_me su durchzällt kütt meh op fönef Hauptdialekte:

Trooßdoorfer Platt
Sieshloorer Platt
Berchemer Platt
Höttener Platt
Aalerödder Platt

Die vier sin wie ad jesaat us dä Jeschich vun Trooßdoorf entstande. Ever eent nom andere.

Trooßdoorfer Platt

Dat Trooßdoorfer Platt ees eng verwandt met däm Sieshburjer Platt. Dat kütt doher, dat die zwei, Trooßdoorf un Sieshburch, su eng beienander lieje. Do han fröher die Trooßdoorfer Buure met dä Sieshburjer Mönche vun dä Abtei om Michelsberch gehandelt. Dat hätt die zwei Sprooche natürlich beeinfluss.

Sieshloorer Platt

Sieshloor wor fröhter en eijenständige Jemeend un su hatten die och ihr eijene Ussprooch. Irzt 1969 met dä komunale Neuordnung dätten Trooßdoorf un Sieshloor zesammekumme. Vun do aan han sich die Sprooche dann wohl anjenöhert. Zo Sieshloor däten domols och Ovverloor, Spich, Berchem, Müllekove, und Eischem jehüüre.

Berchemer Platt

Berchem, Müllekove, und Eischem däten zwar zo Sieshloor jehüüre han äver en eijene Sproochentwicklung jemaat. Doorch di Nöh vun Berchem un Müllekove zo Mondoorf un Nidderkaassel woren do och die Berührungspunkte jrüsser als met Sieshloor. Dat heeß dat och die Sprooch sich eher en die Richtung entwickelt hätt. Dat ees hück noch ze hüüre. Die Lück in dä Dörfer rollen dat R veel mieh als die andere Trooßdoorfer.

Höttener Platt

De Hött oder Friedrichs Wilhelms Hütte wie et richtich heeß ees öm de Joorhundertwend jeründ wudde un wor en Arbeedersiedlung. Die Arbeeder kommen zom jrossteil us Kölle. Jenaujenomme us Köln-Kalk. Su hätt dat Höttener Platt ene unheimliche Kölsche Eenfluß jekriech. Nohm Kreech dät de Hött dann zo St. Aujustin jehööre un die spreche och wedder jet anders.

Aalerödder Platt

Aaleroth litt wick em Noorde vun Trooßdoorf en de Wahner Heed. Et hätt für 1969 zo Luhmer jehüürt. Ees doch klar dat och die Aalerödder anders kalle als die Trooßdoorfer.

Et Platt verschwind

Trooßdoorf hätt en de letzte Joore en jrusses Wachstoom erlev. Dat ees leider für de Sprooch net esu joot. Veel Zojezochene spreche nur Huhdeutsch oder andere deutsche Sprooche. Et sin äver och noch andere Europäische Sprooche met der Zojezochene dobeijekumme. Dat alles hätt leider zur Folje dat et Plattspreche noh un noh verkümmert un sich zo enem Kauderwelsch entwickelt wat met dem ursprüngliche Trooßdoorfer Platt nix mieh ze donn hätt (Rheinischer Regiolekt).

Süch och

de Swadesh Lėßß förr_et Trooßdorfer Platt
de Wenker Säz op Trooßdorfer Platt
de Wenker Säz op Sieshloorer Platt
de Wenker Säz op Berchemer Platt
de Wenker Säz op Höttener Platt
de Wenker Säz op Aalerödder Platt
de Sigge op Trooßdorver Platt