Ossheim
(mieh kölsche Sigge)
unn jeshrivve wii_mer_t_shprish
(mieh Sigge jeshrivve wii_mer_t_shprish)
Ossheim oder Uustem (ofizjell: Köln-Ostheim) es e Veedel vun Kölle, dat lidd op de Schäl Sick em Oste, ed jehüürt zom aachte Stadtbezirk vun Kölle. Zur Zigg wunne fass 11 000 Minsche in Ossheim.
Ossheim wor lange Zigg nur e Buuredorf wat zo Merrem jehührt hät. Et loch an d´r Grenz vum Herzogtum Berg noh Kurkölle, deshalb wor do nit vill los. Eets 1710 hät dä Pfarrer vun Merrem, dä Gottfried Krautwigh, us singem eigene Spardösje dä Ossheimer et Servatiuskapellche jebaut. Im Protokoll vün dä Weihung steht et eetste mol jet vun nem Dorf namens Ossheim drin.
Am Anfang vum 20. Johrhundert, sin allerhand Arbeider von dä Fabrikke in Kalk un Müllem noh Ossheim jetrocke, denn durch die janze Industrie wohr in dä Industrieplätz nie mieh vill Platz för Wuhnunge. Dat klein Kapellche wor dä Ossheimer Katholike 1906 nit mie jroß genoch, deshalb han se et avjerisse un jäjenövver de Servatiuskirch jebaut. Ach johr spääder, am 1. April 1914 es Ossheim zosamme mit Merrem noh Kölle einjemeindet woode.
Die Stadt Kölle hät schon 1904 dofür jesorch dat Ossheim ne Anschluss an de Stroßebahn jekrääje hät. Domit die Bahn jenoch Strom bekom, han se e Dampfkraffwerk in dä Nöh vun der Haltestelle jebaut. Dat wor äwwer nur koot in Betrieb, weil die Stadt 1914 ne Stromlieferungvertrach mit dä Rheinbraun jemaat hätt. Donoh woot dat Kraffwerk zur Umspannstation ömjebaut. Op beide Sigge von däm Huus is dat ahle Kölsche Wappe drop, äwwer op dä ein Sigg muss dä Steinmetz jeschloofe han, denn do hät dä zwöllef Flamme anstatt dä rischtije ellef op dat Wappe dropp jemaaht.
In d´r Drißiger-Johr is in der Saarbrücker Stroß die eetste Einfamiliehuus-Siedlung in Ossheim jebaut woode, koot drop han die Nazis dä Fliejerhorst Ossheim jebaut domit vun do uss mit nem Jachtjeschwader Kölle verteidicht weede kunnt. Nohdemm de Amis am 13. April 1945 dä Fliejerhorst övvernomme han, han se en kappot jemaat, denn se kunnten en nit mie jebruche. Die ahl Kasernejebäude wooden spääder vun dä Firma Madaus und däm Krankehuus Merrem jenotz.
In dä Fuffziger-Johr hätt die GAG en jroße Siedlung am Buchheimer Wech jebaut. Zur gliche Zigg woot mit demm Badener Veedel en zweite Einfamiliehuussiedlung jebaut. Spääder han se an de Jernsheimer Stroß en janze Menge Huhhüüser jebaut - die anjeblich a joot Beispiel für dä moderne soziale Wohnungsbau in Kölle sinn sullte. Dat han de Lück äwwer nit esu jesinn, deshalb sin die Hüüser inzweesche ziemlich verloddert und dat es jetz ne Sozale Brennpunkt. Für de nächste Zigg ess jeplant dat de GAG en neu Wohnsiedlung, dat sojenannte Waldbadviertel am Langendahlwäch baut. Do sulle Wunnunge für zweidausend Lück jebaut weede - de Ossheimer fingen dat ja nit joht un protestiere dojäje - weil se Angs han dat die Infrastruktur im Stadtdeil dofür nit ussreich.
Feste un sönstige regelmäßige Veranstaltungen
[Ändere · der Quälltäx ändere]Immer de Woch noh Pfingste fiere de Ossheimer Schötze ihr Fess op dem Maatplatz an d´r Rösrather Strooß, im Juli määt d´r Stammdesch 1. Ostheimer Hunnen am Schulzentrum e Hunnelager, dat drei Dach duurt. Alle zwei Johr orjanisiert dä Veedel e.V. dat Stadtteilfess „Wir sind Ostheim“. Do helfe de janze Ossheimer Vereine, Institutione un Privatlück met - dä Erlös weed für soziale Projekte in Ossheim verwendet.
