Baaß

Uß de Wikipedia
Zur Navigation springen Zur Suche springen
Hee die Sigg es op Kölsch
(mih kölsche Sigge)
un jeschrevve wie beim Wrede
(mih Sigge jeschrevve wie beim Wrede)
De Dijaläkte un wi mer t bochshtabbėerre kann
Dremmener Platt :  Baas
Jömelejer Platt :  baas
Kölsch (Rheinische Dokumenta) :  Baas
Kölsch (Ripoarėsch Töhn) :  Baaß
Kölsch (Wrede) :  Baas
Kölsch (Wrede un Akademie jemesch) :  Baas
Krieevelsch (Shprooch) :  Baas
Nederdütsch :  Baas
Nederlands :  baas (werk)
Rhinberkse Platt :  Baas


Op der Baas moß De hüre. Der Baas deit bestemme. Wat der Baas sät, dat weed jedonn.

Wä sage soll un kann, wat jemaat weed, wie et jemaat weed un wo et lahns jeiht, dat es der Baas.

Der Buur es der Baas om Hoff, de Knäächte un de Määchte don op inn hüre. Em Betrieb es et der Meister, ov der Meisterknääch bei de Handwerker druße. En der Schull es der Rekter der Baas vun de Lihrer. En de Kirch sen et de Pastör, ävver över denne ston de Beschöff, un do drövver der Paps; un dä eß unfählbar. Der Päsident es em Verein der Baas. Em Hushald es öff de Mam der Baas. Beim Kammiss hät mer och en janz Litanei, wä der Baas un däm singe Baas es, vom Ufz bes noh'm Jeneral. Andere Name för der Baas sen Direkter, Vörstand, Vörsetzer, Führer un Jeschääfsführer, Rot, je nohdämm, wat_fürr_ene Lade oder Firma dat jrad es. Ne Handelshär es der Baas von singe Aanjestellte. Un ene freie Kaufmann es villeich ene Laufmann, ävver singe eije Baas.

Der Baas von de janze Welt, mem Universum dren, esu jeit der Kall, es der Leeve Jott.

Esu, jetz weßt Ühr et.

Loor och hee[Ändere · der Quälltäx ändere]