1. FC Köln

Uß de Wikipedia
Zur Navigation springen Zur Suche springen
Dat is et Wappe vum Effzeh ohne Jeissbock

Effzeh (1. FC Köln) es enne Foßballvoreijn us Kölle — Hä es sick singe Jröndung dreimol deutsche Meister un viermol Pokaljewinner jewodde. In dä Säsong 1977/1978 hät_e _ret_duuble jehollt. Dat mäht däm zum ihrzte Clob ahm Rhing. Dä Effzeh spillt im RheinEnergieStadion wat fröher et Müngersdorfer Stadion wor.

Vürjescheech un Jröndung[Ändere · der Quälltäx ändere]

Vür däm FC hät jede jroße Stadt en Dütschland ehre jroße Verëin jehatt, ävver ekersch en Kölle jov et bloß Veedelverëine, wie der SpVgg Sölz udder der Kölsche BC. Se wore zwor rejional janz joot, ävver kunnte nie janz bovve metmische.

Dä KBC spillte zoëesch en Rehl, dann en Ling, anschleeßend en Müngersdörp un zom Schloss en Klettebirch, dat för knapp veezich Johr. Zenöhks kunnt dä Club nit met ander Verëine methalde, ävver esu öm 1910, als en nöij Verbandslija jegründt woodt, bekom hä de Schongs dozo un woodt 1912 Meister vun der Lija; mer wor alsu för et Final vun der Wessdütsche Meisterschaff qualifizeet. Em Final jov et dann dat eeschte övverleeferte jroße Duëll tösche Kölle un Münche-Jläbbisch, dat met 4:2 jewonne woodt. Wäjen däm Seech kunnte dä Club us Klettebirch bëi der Dütsche Meeschteschaff metmaache, ävver met däm Draum woodt nix, dä KBC floch met 1:8 em Veedelfinal jäje Karlsrauh erus. Dä Verëin wor spädder dann janz en Oodnung, doch hä kunnt nit an dä Erfolg vun 1912 aanbahne.

Dä SpVgg Sölz woodt 1907 jejröndt un spillte en Müngersdörp, mänchmol en der Houwpkampbahn, ävver bëi jroße Spille dann em Müngersdörper Stadion. 1928 woodt dä Verëin Meister vun der Reijonalliga un jagte dann em Anschloss en der Meisterschaff der FC Schalke 04 met 7:2 vum Platz un jewann veer Spille wigger och dat Turnier. En der Dütsche Meisterschaff ävver scheede de Junge us Sölz em Veedelfinale jäje Bayern met 2:5 us, dat ävver noch enem üvveraschende Seech jäje Frankfurt (3:1). 1929 spillte mer widder en der Dütsche Meisterschaff, ävver dä Spillverëinijung verlor do en Berlin jäje de Hertha met 1:8. Dä Verëin joldt dunnemols als ärch professionell.

Nohm Kreech ävver, wor Schloss met jroße Spille; dä Verëine wore unbedüggend jewoode, dä Kremers Franz, selvs Spiller bëim KBC un anschleeßend Baas vum Verëin wollt ene Jroßverëin jrönde, för janz bovve metzemische. Zoëesch frocht hä der SV Union Kölle, doch de Junge om Zollstock hatte këin Loss, de Welt ze erobere. Alsu jingk dä Franz noh Sölz zor Spillverëinijung. Bëids wore ävver nit de bess Fründe. Doch dann saht der Kremer singe bekannte Satz:

„Wollt ehr met mir Dütscher Meister wääde?“

Dä Büttjens Karl, dä Baas vun de Sölzer, wor dann üvverzeug. Weil et ävver och e paar Kühlesköppe en Sölz jov, de leever janz unge blieve wollte, saht hä:

„Tradition hät ekersch Senn, wann der Welle för jrößer Date och do es“

Dä Kremer hatt Erfolg met singem Plan, am drücksehnte Februar 1948, an enem Frëidaach, stemmte 121 vun 156 Metjlidder för de Fusijon, bëim KBC wore 156 vun 166 jewellt för et Aventörche. Un och an dis Daach woodt dä FC en der „Roggedörp“-Weetschaff jejröndt. Kremers Franz woodt zom Baas jemaht. Der Karl Fink woodt eeschte Trainer vun der Manschaff.

Mänche Jecke us Münche-Jläbbisch, Levverkuse un Düsseldörp dun sage, dat, weil dä FC an enem Frëidach däm Drücksehnten jejründt woodt, dä FC wäjen däm su vill Pech jehat hät.

Zenöhks wor dä FC nit esu joot ahnerkannt, sintemole dä Name (1. FC Kölle) un däm Verëin sing Ziele (Dütscher Meister) als enjebildt un decknäsig emfunge woode. Doch de Junge us Sölz/Müngersdörp wonne ehr eeschte Spill jäje ene Neppeser Mannschaff met 8:2. Dat eeschte Duur schoss der Walter Radant. De Opstellung:

Harry Nelles – Stefan Langen, Heinz Hungs – Ernst Moog, Eduard Szilinski, Hennes Weisweiler – Walter Radant, Franz Alexius, Hans Faber, Willi Weyer, Wilhelm Lipponer

Dä FC woodt Eeschter en der Jrupp, ävver dä Opsteech en de Ovverlija woodt en de Entschëidungsspille verpass.

Eeschte Johr[Ändere · der Quälltäx ändere]

En der Säsong 1948/49 bekom dä FC ene junge Schäfers Hans; entösche wor der Hennes Weisweiler Trainer un och Spiller. Schäfers Hans sollt en de wigger Johr önjefähr 304 mol treffe. Dä Effzeh woodt widder eeschter vun der Jrupp un wonn och engklich de Entschëidungsspille jäje Levverkuse (2:0,3:1). 1950 woodt dä Effzeh Fünnefter un verpasste de Dütsche Meisterschaff. 1951 kome der Frans de Munck un der Röhrigs Jupp nohm FC. Dä Jupp woodt och de eeschte Nazijonalspiller vum FC. Derwiel funge däm FC sing Spill en Müngersdörp un nit mieh en Sölz statt.

1950 bekom der FC si Maskottche, ävver op ëijendömliche Aat: Op ene Karnevalssetzung woodt däm Verëin ene Jëißbock jeschenk. Dat Deer woodt „Hennes“ jedouwf.

1952 jingk der Weisweiler noh Rheydt, ävver der FC kunnt sing Klass halde; mer woodt Zweiter un kunnt en der Dütsche Meisterschaff engklich metmische, doch dä Verëin schidd fröh us. Doch en dä Säsong woodt trotzdäm dä eeschte Titel jewunne, jäje Esse errunge de Kölsche der Wessdütsche Pukal. 1954 kom dä Effzeh bes en dat DFB-Pukalfinale, doch do wor jäje Stottjaat met 0:1 Schloss. En dä Säsong wonn mer och zom eeschte Mol de Ovverlija.

En de foljende Johr spillte der FC zwor janz bovve met, ävver et rëichte nie för ene Titeljewinn, ovschüns jooder Spiller wie däm Karl-Heinz Schellinger udder Schorsch Stollenwerk. Der Poul Mebus un Schäfers Hans woode vum Bondestrainer Sepp Herberjer zor WM ëinjelade, wo se Weltmeister woode.

1958 kom dann dä Christian Müller zom Effzeh.

De 60er[Ändere · der Quälltäx ändere]

1960 un 1961 woodt dä FC zweimol hingerëinander Meister vun dä Ovverlija. Em eeschter Johr packte der FC dat Finale vun der Dütschen Meisterschaff, ävver do wor Schluss jäje Hamburch. Nöije Lück en der Mannschaff wore der Ewerts Fritz un Leo Wilden. Der Jupp Röhrig verleet der FC. 1961 spillte dä Effzeh zom eeschte Mol Europapukal, ävver dä FC trodt als Stadtuswahl em Messepukal op. Do erwaadt sëi Inter Mailand. Noh enem 4:2 em Hinspill verlor de Mannschaff en Mailand 0:2. Weil et këi Elfmeterscheeße jov, moote bëids noch ens ran, ävver lëider trok dä FC dä Köötere (3:5).

Och 1962 wonne de Jëißböcke de Ovverlija, ävver dat hät këine Jeck interesseet; mer wollt engklich Dütscher Meister wääde. Un dä FC kom tatsächlich en dat Finale; wo se jäje Nürnbirch en Berlin spille moote. Der FC wonn 4:0, de Duure schosse der Ähnz-Jünther Habig un der Fritz Pott.

De Meistermannschaff:

  • Dur: Fritz Ewert
  • Avwerr: Matthias Hemmersbach; Fritz Pott; Karl-Heinz Schnellinger; Leo Wilden
  • Meddelfeld: Ähnz-Jünther Habig ; Hans Sturm; Schäfers Hans
  • Anjreff: Christian Breuer; Christian Müller; Karl-Heinz Thielen
  • Trainer: Zlatko Čajkovski

Der FC kunnt alsu met däm Jewinn vun der Dütsche Meisterschaff och en Europa metmaache, em Europapokal vun dä Landesmeistere.

Doch dat eeschte Spill, jäje Dundee woodt met 1:8 verlore, alsu braht dat 4:0 em Röckspill jar nix. Der Zlatko Cajkovski, dunnemols Trainer soll jesaht han: „Am bess, Flogzeug stürz av! “.

1963 kom dä FC dann widder en et Finale, ävver wäjen enem 1:3 jäje Dortmungk fluppte et nit. Noh däm Finale verleet der Karl-Heinz Schnellinger der FC un jingk noh Italië.

Bundeslija[Ändere · der Quälltäx ändere]

Während de meeschte Länder en Europa en richtije Lija hatte, hatt Dütschland noch e ahl Jebild us Rejionallije. Su jet hät dozo jefoht, dat sech de jroße Verëine, wie der FC udder Nürnbirch de meeschte Zick nix ze dun hatte. Wäjen däm woodt beschlosse, dat de jroße Clubs vun der Fossballsäsong 1963/64 an en ener Lija spille solle. Och der Kremers Franz hät janz lang för en Lija jekämf, dat met Erfolg.

1963/64 spillte der FC dann en der eeschte Säsong ärch joot un secherte sech noh enem 5:2 jäje Dortmund am 28. Spilldaach de Meisterschaff. Met 45:15 Punkte stundt der FC am Engk an der Tabellespetz, dat wöre hück, noh der 3-Punkte-Rejel 62 Punkte. Dä FC hät en de 60er esu joot jespillt, dat hä och „Real Madrid vum Weste“ jenannt woodt.

Uußerdäm debüteete en dä Säsong zwei nöij Spiller bëim FC; der Wolfjang Ovverath un der Wolfjang „Bull“ Weber. Beids sollt ze jroße Spiller bëim FC un ze FC-Orijnale wääde.

De Meistermannschaff 1964:

  • Dur: Fritz Ewert (26 Spiele/kein Tor); Toni Schumacher (4/-)
  • Avwerr: Matthias Hemmersbach (17/-); Fritz Pott (27/1); Anton Regh (29/-); Wolfjang Weber (17/3); Leo Wilden (29/1)
  • Meddelfeld: Helmut Benthaus (27/1); Wolfjang Overath (30/8); Karl-Heinz Ripkens (1/-); Hans Sturm (30/13)
  • Anjreff: Heinz Hornig (24/7); Christian Müller (22/15); Schäfers Hans (22/12); Karl-Heinz Thielen (25/16)
  • Trainer: Schorsch Knöpfle

Och em Messepukal hät der FC metjemisch. Noh Sieje jäje KAA Gent un Sheffield Wednesday stunde se jäje AS Rom em Veedelfinale. Der FC verlor zwor dat Hinspill met 1:3; ävver en Kölle jelung de Kölsche e fulminant 4:0, su dat se em Halvfinale stunde. Do wor ävver jäje Valencia us Spanië Schloss (1:4, 2:0).

Em foljend Johr wor der Verëin evvesu op enem joode Wäch, sing Mëisterschaff ze widderholle, ävver am Engk wor et dann Werder Breme, dat fiere dorf.

Spannender wor dojäje dä Trip durch der Landesmeisterepukal 1964/65. Dort trof der FC, nohdäm hä Tirana un Athen beseecht hatt, op Liverpool. Dat Spill es bes Hück unverjesse un weed luuter nohverzallt.

Liverpool jingk als Favorit en dat Spill, dä FC moot ohne Schäfers Hans antredde, weil dä sech wihjedon hatt. Em Hinspill en Kölle kom e 0:0 dobëi erus, och en Liverpool em Röckspill jov et këine Dure. Weil dunnemols nümmes Elfmeter jeschosse hät, trofe sech beids en Rotterdam, för et Widderhollungsspill uszedrağe. Der Wolfjang Weber broch sech et Wadebein, doch hä spillt wigger. Liverpool loch entösche 2:0 vorn, ävver der Karl-Heinz Thielen un der Hannes Löhr mahte dodrus e 2:2. Dem Heinz Hornig singe Dur zom 3:2 woodt anschleeßend ävver nit jezallt. Et jingk en de Verlängerung, dä Boddäm bestund dann zom Dëil ekersch us Murass. Ävver et feele këine Dure, su dat ene Münzworf helfe moot. Dä Schiedreechter hollte en rut-wieß Münz erus un bestemmp, dat Rut vör Liverpool stëiht un Wieß för der FC. Domet jov et eeschte Bedenke, do mer normalerwies de Mannschaffskaptäne de Färve vun der Münz ussöke leet. Bëim eeschte Worf blevv de Münz em Murass steche, un dat senkräch. Bëim zweite Worf ävver wor Rut bovve, su dat Liverpool wigger kom. Der FC scheed alsu op en trajische Aat un Wies us; selvs der Bill Shankly, Trainer vun Liverpool saht, dat der FC et nit verdeent hät, durch e Münz uszescheede un sujar, dat Liverpool nit besser jewese wör.

Schäfers Hans häht noh der Säsong sing Karjär beëngk.

1965/66 stundt der FC en der Lija em Schatte vun Dortmund un 1860 München un woodt Fünfter. Em Messepukal jov et e 13:0-Seech jäje Union Luxemburch, ävver de Verëin blameete sech dann en der 3.Rund jäje Újpest Budapest (3:2, 0:4). De Föhrung hatt dan jenoch vum Schorsch Knöpfle un hollte Willi Multhaup för de nöhkste Säsong. Dä widderöm hollt der Durmann Milutin Soskić us Beljrad, för dä Verëin ze verstärke. Et braht ävver nix, ekersch ene 7.Platz en der nöhkste Säsong.

Am 11.11.1967, trorijierwies am Bejinn vun der 5. Johreszick storv op ëinmol der Kremers Franz met 63 Johr. Noh ehm wor der Werner Müller met Zigge Baas, ih dat der Oskar Maaß dann 1968 jewählt woodt.

Sportlich jesinn verleef et besser för die Sölzer, wie en die letze zwei Spillzigge: Met däm Carl-Heinz Rühl un enem jewesse Heinz „Flocke“ Flohe kom am Engk dä 4. Platz erus. Och der Hannes Löhr wor janz joot ungerwächs un schoss 27 Duure. Em Messepukal wonn mer jäje Slavia Prag. Em Hinspill en dä nöhkste Rund jäje de Glasgow Rangers jov et e 0:3. Em Röckspill en Kölle foht der FC noh 90 Minute och met 3:0, sudat en Verlängerung kom. Do ävver feel dat 1:3 un der FC es baal erusjefloğe. De Möhte wore alsu för lau. Am bess wor et dojäje em Pukal, der FC hät sech do jäje Homburch, Frankfurt, Brungschweig un Dortmund durchjesetz un stundt em Finale jäje Bochum. E Eijedur vum Bochumer Jablonski, e Dubbelpack vum Rühl un e Treffer vum Löhr sorchte för e 4:1 en Lundwigshafe.

Der FC wonn esu och dat eeschte Mol der DFB-Pukal. un kunnt em Pukalseejerpukal metmaache. Dä nöije Trainer wor der Hans Merkle. Em Dur woodt der Hans Merkle dä nöije Mann, nohdäm sech der Soskić wihjedon hatt. Der Pitter Blusch un der Werner Biskup wore nöije Lück en der Avwerr un em Meddelfeld. Em Pukalseejerpukal sollt der FC zoëesch ëintlich jäje Bukarest spille, ävver wäjen däm Prager Fröhling wollt këin Wesseuropäische Mannschaff jäje osseuropäische antredde; et woodt alsu noch ens jelos, dismol wor et Girondins Bordeaux. Noh enem 1:2 em Hinspill jov et e 3:0 em Röckspill, der Fc wor wigger. En dä zwei nöhkste Runde woode der ADO Den Haag un die Randers Freja usjeschald. Jäje Barcelona, em Halvfinale erreichte der FC em Hinspill e 2:2, doch et wor ömesöns, dann dat Röckspill woodt met 1:4 verlore. Der Pukalseejerpukal wor ävver dä ëinzije Wettbeverv, wo et jeflupp hät. Em DFB-Pukal floch der FC en der 1. Rund jäje der VfB Stuttjart erus. En der Lija stoch der FC em Avsteechskamp fess un kunnt sech ekersch am letze Spilldaach rette: der Ovverath, der Rühl un der Hornig trofe zom 3:0 jäje Nürnbirch un heelte der FC en der Lija. Am Engk stundt der FC op däm 13. Platz.

1969/70 wor der FC widder op Meisterkurs en der Lija, nöije Spiller wore der Manfred Manglitz em Dur un der Bernd Rupp em Anjreff. Der Verëin stundt am 27. Spilldach janz bovve, ävver spillte dann latschig un stözte op Platz 4 av. Dütscher Meister woodt usjerechnet dä Äzrivale, Borussia Münche-Jläbbisch. Em Pukal jewann der FC, noh enem Seech jäje Rut-Wieß Esse, met 6:1 en Duisburch en der 2. Rund. No Sieje jäje Jläbbisch un Ooche stundt der FC, wie vür 2 Johr, em Final; dismol jäje Offebaach, dat en Lija 2 ungerwächs wor. Der FC blameete sech do met enem 1:2 em Engkspill.


De 70er[Ändere · der Quälltäx ändere]

De Saison 1970/71 verleef en der Lija, trotz däm nöije Trainer Ähnz Ocwirk, ärch schlääch för der FC, et kom ekersch dä 11. Platz erus. Besser wor et em letzte Messepukal; de Rut-Wieße leete der CS Sedan us Frankreich (5:1, 0:1), der AC Florenz (2:1, 1:0) und sujar Arsenal (1:2, 0:1; jewonne wäje der Uswäätsdurrejel) hinger sech; ävver der Versök em Halvfinal , em letzte Messepukal jet ze jewinne, fluppte jäje Juentus (1:1, 0:2) nit. Em DFB-Pukal kom der FC widder bes zom Final, doch dat woodt, wie em letze Johr, verlore; dat Mol jäje Bayern Münche (1:2 n.V.). Der Gerhard Welz, der Jupp Kapellmann un der Bernd Culmann kome en dä Saison zom FC.

Ungerm Strich wor die Spillzick iher mau un wäjen däm woodt der Ähnz Ocwirk jefüürt un durch Gyula Lorant ersetz. Nöij bëim FC wore der Jürgen Glowacz un der Harald Konopka un et fumpte och widder en der Lija; der FC errëichte dort dä 4. Platz. Wëil der FC vürje Saison em Pukalfinal stundt, kunnt mer em nöije UEFA-Pukal metmaache; doch en dä 2. Rund moot sech der FC usjerechnet jäje Dundee widder jeschlonn jevve.

Nerveprobe jov et fär de FC-Fans em DFB-Pukal, der em Hin- un Röckspill usjedrağe woodt. Noh enem 14:1-Seech jäje der Essener FV (9:1, 5:0) en der eescht Rund, trof der FC op Offebach. Et Hinspill jingk zwor 1:3 verlore, doch em Röckspill wonn der FC met 4:0 un revancheerte sech för et verlore Pukalfinal. Jäje Bayern Münche loch der FC en der nöhkste Rund widder mit 0:3 zeröck, ävver widder kunnt sech der FC em Röckspill rette (5:1). Die Taktik fluppte ävver nit jäje Schalke; et Hinspill woodt zwor met 4:1 jewonne doch noh'nem 2:5 n.V. em Röckspill floch der FC, noh däm verlore Elfmedderscheeße us däm Wettbewerv.

Wäjen der Foßball-WM 1974, die dunnemols am Kumme wor, moot et Müngersdörper Stadion av 1971 ömjebouwt wääde, su dat der FC vun do an en der Raddrennbahn jespillt hät. Ovschüns ekersch 22.000 -28.000 Zoloorer erenjinge kunnte, joldt de Raddrennbahn wie en Festung un vill Fans schwärme hück noch vun dä Zigge.

Nöije Trainer för de Saison woodt der Rudi Schlott; de Mannschaff woodt met däm Herbert Hein un däm Herbert Neumann verstärk. Der FC spillt de beste Saison zick aach Johr un woodt Zweiter. Em Pukal kom der FC widder en dat Final un spillt jäje Münche-Jläbbisch. Wie et 1:1 stundt, wähßelte sech der Jünter Netzer en der Verlängerung selvs ëin un maht et 2:1, wat en de Annale ëinjingk un zom Seech foht. Dä FC moot widder met Selver zefridde sin. Em UEFA-Pukal hät der FC en der zweiten Rund Viking Stavanger us Norwäje em Röckspill met 9:1 bezwunge (Zesammejefass mäht dat 9:2); esu huh hät hä selde jewonne. Ävver em Achtelfinal sin de Kölsche Junge erusjefloğe, widder jäje Münche-Jläbbisch (0:0; 0:5). Pitter Weiand woodt nöye Klubbaas.

En der Saison 1973/74 kom Tschik Cajkowski–ene ahle Bekannte zom FC.




Dä Jescheschte von däm Effzeh[Ändere · der Quälltäx ändere]

Wie wood dä Effzeh Meister 77/78[Ändere · der Quälltäx ändere]

Dä aale Lückscher verzälle noh_hück davun. Dä Pokal hät dä Effzeh ad lang jewunne. Et wor de knappste Entschejdung in dä Bondeslija die et je jav. Vür däm letzte Shpilldaach wor Borussija Mönschenjladbach un_dä_Effzeh punktjeleisch ävver dä Effzeh hät sivven mieh Duure jeschosse. Aan däm letzte Spilldaach spillte dä Effzeh jejen Fc Sankt Poulie un dä Bettsecker jejen da dä reschtije Borussija. Mönschenjladbach hät Dortmund met zwölef zo noll affserveet. Ävver dä FC hät_et jelesch jemaat un Sankt Poulie met fünef zo noll jeschlare. Am End wurd dä Effzeh met dreij Duure vurschprong Meister. Seijt dä Zick kann dä Effzeh Sankt Poulie jot ligge. Mönschenjladbach ävver nit.

*Dä Tabell 77/78
Platz Vereen Shpill Sieje Unentsch. Niederl. Dührsche Punkte
1. 1. FC Köln 34 22 4 8 86:41 48-20
2. Borussia M'gladbach 34 20 8 6 86:44 48-20

Dä Münezwuref vun Rotterdam[Ändere · der Quälltäx ändere]

Libpool won.

Kütt_a oda kütt_a nish[Ändere · der Quälltäx ändere]

Am nüngten Novemba hätt dä Effzeh sing Dräner Hanspeter Latour entlasse, weil dä, zwa jejen Schalke im DFB-Pokal ne jode Fijur jamaat hät, ävver in de Tabell vun dä 2. Lija nix jebraat hät. Do hanse däm Christoph Daum anjerofe, der jerad wejen_em_kleene Malääd in_nem Krankehuss in Kölle jeläje hät. Dä Daum wor_ad_ens Dräner bejm Effzeh jewesse, dat wor 19861990. Dat wor_et_letzte mol jewäse, wu da Effzeh vürre mitjespellt hät. Daum, dä mit däm Häz am Effzeh hänk, hat et sish üverläsh un en Pressekonfarenz inberoofe, un zwar am 11.11.2006 um 10:00 Uhr. Da han alle jehoff, dat der sish darövver nachjedach hät, un et jeroß verkündije wullte, dat der Dräner beijm Effzeh wird. Doch do hät der jesat, dat dat nit jegange wör, weil er zu beripsch is, um dat zo schaffe. Dann hat sish dä Meier und dä Ovverath in et zeush jeläsch, um däm do_noch zu holle. Et hät ävver nit jeklapp. Dat wor der 15.11.2006. Drie Dach später rövt der Daum bejm Meier an, dat er et doch noch mache wullt. Do wußßta ma nit mät_der_dat oder mät_der_dat nit. Am End hätt_a_dat doch jedonn. Nach_em_Spell jejen 1860 hät dä Meier en Pressekonfarenz inberoofe und verkündicht, dat der Daum e_su_schnell_ad_er künnt aanfange dät. Der soll jez am 04.12.2006 jejen Duisbursch (Foßball) ad ens up dä Bank setze.

Erfolje noh der Reihenfolje[Ändere · der Quälltäx ändere]

  • 1949 Mittelrheinmeister, opjesteje in dä 1. Lija Weß
  • 1953 Westdeutscher Pokalsiejer, Westdeutscher Vizemeister
  • 1954 Westdeutscher Meister, Deutscher Vizepokalmeister
  • 1958 Westdeutscher Vizemeister
  • 1959 Westdeutscher Vizemeister
  • 1960 Deutscher Vizemeister, Westdeutscher Meister
  • 1961 Westdeutscher Meister
  • 1962 Deutscher Meister, Westdeutscher Meister, Westdeutscher Pokalsiejer
  • 1963 Deutscher Vizemeister, Westdeutscher Meister
  • 1964 Deutscher Meister, Westdeutscher Pokalsieja, Westdeutscher Jurendmeister
  • 1965 Deutscher Vizemeister, Westdeutscher Jugendmeister, Amateur-Mittelrheinmeister
  • 1967 Amateur-Mittelrheinmeister
  • 1968 Deutscher Pokalsiejer', Westdeutscher Jugendmeister
  • 1970 Deutscher Vizepokalsiejer
  • 1971 Deutscher Jugendmeister, Deutscher Vizepokalsiejer
  • 1973 Deutscher Vizemeister, Deutscher Vizepokalsiejer
  • 1977 Deutscher Pokalsiejer, Amateur-Mittelrheinmeister
  • 1978 Deutscher Meister, Deutscher Pokalsiejer
  • 1980 Deutscher Vizepokalsiejer
  • 1981 Deutscher Amateurmeister
  • 1982 Deutscher Vizemeister
  • 1983 Deutscher Pokalsiejer
  • 1986 UEFA-Cup-Finaldeilnehmer
  • 1989 Deutscher Vizemeister
  • 1990 Deutscher Vizemeister, Deutscher Jugendmeister
  • 1991 Deutscher Vizepokalsiejer
  • 1993 DFB-Hallen-Masters-Siejer
  • 2000 Meister vun dä 2. Bundeslija, opjesteje in dä 1. Lija
  • 2003 opjesteje in dä 1. Lija
  • 2005 opjesteje in dä 1. Lija
  • 2008 opjesteje in dä 1. Lija
  • 2014 opjesteje in dä 1. Lija
  • 2019 opjesteje in dä 1. Lija

Luur och[Ändere · der Quälltäx ändere]

Websigge[Ändere · der Quälltäx ändere]