Weihnachte

(1) Domols, en dänne Daare, doh erleet de Kaiser Aujustus eh Jesetz, dat se de jannze Welt opschriewe un zälle sollte.
(2) Et wor et ierschte mol dat se jezällt hann un wor zo dä Zick, als Quirinus de Överste von Syrien wor.
(3) All jingen se hin, sich opschriewe ze losse, jeder in sing Stadt.
(4/5) Och Joseph trock met Maria, singem Mädche, dat in Ömständ wor, von Nazareth in Galiläa erob noh Judäa, en die Stadt vom Könning David, noh Bethlehem, öm sich doh endraare ze losse.
Se mooten dohin, weil de Joseph von doh eß; us dämm Huus un d'r Famellisch vom Könning David.
(6) Als se äwer in Bethlehem aanjekomme woore, passerde et, dat die Daach von de Ömständ ze end jinge. Maria kräät ihr Kind. Dat Kind wor eh ne Jung un et ierschte Kind, dat se ze Welt jebraach hat.
(7) Se däät em Windele öm un laat en in en Vooderkripp, weil se en eh ne Härbersch keene Platz jefunge hatte.

(8) Un en dä säleven Jäjend wore Hirte om Feld, die heelten Naachwaach bei ihre Schööf.
(9) Doh troot eh ne Engel vom Herrjott zo inne, dat inne de janze Praach vom Herrjott im Jesech jeschrewe stont. Se woore ersch bang,
(10) äwe dä Engel saat zo inne: Sed net Bang! Denn ich bränge üsch en jruße Freud von der all Lück jet hann solle.
(11) Denn hück eß üsch in der Stadt vom Könning David de Heiland jeboore, de Messias, uuse Herr.
(12) Dat sollt'r als Zeiche hann: Ihr weerd eh Kind finge, dat en Windele jeweckelt en eh ne Vooderkripp litt.
(13) Un op eemol woren bei dämm Engel noch janz veel andere Engel, su vell dat me se net zälle konnt. Die dääten de Herrjott lobe un sprooche:
(14) IIhr soll em Herrjott em Hemmel sen, un die Minsche op d'r Äärd, die jooden Willens sen, solle Vridde hann.

(15) Un als die Engel widde von inne zeröck in de Hemmel jejange woore, saaten de Hirte zo sich: „Loot uns noh Bethlehem jonn un luure wat de Herrjott uns opjedraare hätt.“
(16) Se maaten sich iilich op de Wääsch un fungen Maria un Joseph un et Kind, dat en eh ne Vooderkripp looch.
(17) Als se et äwer jesen hatte, saaten se alle Lück dat, wat me inne von dämm Kind jesaat hat.
(18) Un all die et jehuurd hatte, hann sich jewondert wat die Hirte verzohlte.
(19) Maria äwe hätt all die Wöörd in ihrem Hätz bewaart.

(20) Die Hirte jinge zeröck un sunge em Herrjott eh Leed, für all dat, wat se jehüürdt un jesenn hatte, su wie et inne jesaat wudde wor.