Porta Nigra

Uß de Wikipedia
Hee di Sigg_is_op Kölsch
(mieh kölsche Sigge)
unn jeshrivve wii_mer_t_shprish
(mieh Sigge jeshrivve wii_mer_t_shprish)
Porta Nigra
vun druße jesinn

vun de Shtadt jesinn

Jebouwd: öm et Johr 180
Ander Shtadtpooze

De Porta Nigra es en ahle römesche Schtadtpooz fun Trier. Dat es ene lattäjnesche Name, dä ävver eetz ussem Meddelallder shtammp, un woh mir de schwatze Pooz för saare däte. Dohmohlß hät mer ävver och et Porta Martis doför jesaat, däm Mars singe Pooz. Hück sare se en dä Shtadt fö jewööhnlesch bloß de Porta doför. Jebouwt woode eß se esu aff 180, janz jenou weiß mer dat nit. Aanfänglesch wohr di Pooz hell, ävver di Shtäijn woote övver de Johre düüster un schwatz, dat kohm fum Verweddere. Di Pooz hät övver de Zick en paa Aanboute krääje, di hück widder fott sin, un annder verloore, di se aanfangs jehat hät. Hück weed se als e Wohrzeiche fun Trier aanjesinn, un de UNESCO hät se op de Leß mem Weltkulturerbe jedonn.

Wi di Pooz jebout wood[Ändere · Quelltext bearbeiten]

e Modell, wi de Porta Nigra en de Römerzick, em veete Johongert looch

Mer schriive et Johr 180, onjevähr, un wat mer hück als Trier kenne, heeß noch Augusta Treverorum, dat es lattäjnesch för em Augustus sing Shtadt em Land fun de Treverer. De Treverer wohre enne järmanesche Shtamm en dä Jääjendt. Do woht ene neue Zohjang en de Shtadt fum Norde, un ene neue Ußjang, jebruch. Mer wohr nämmlesch jrad en neu Shtadtmoor aam opreschte. Dodoför woht Sandshteijn jenumme. Spääder es dat en Verjesseheit jeroode, wann di Pooz jenou jebout wood, un mer hät en Zick lang aanjenumme, et wöhr eets em drette udder esujaa em feete Johongert jewääse, dat hät sesch ävver nit dorschjesatz.

Di zweij Name för di Pooz, Porta Nigra un Porta Martis, sin ävver et eets en enem Booch uss_em zwöllefte Johrhongert ze lässe jewääse, dä Gesta Treverorum. Do heijs_et övver de Treverer:

Se nannte se de Mars-Pooz noh däm Mars, dä se als dä Jott fum Kreesch ansooche; wann se erus trockke för en der Kreesch ze jonn, do sen se uß dä Pooz eruß mascheert. De Schwatze Pooz woot se ävver jenannt wäje dä Truuer, met dä se dorsch di Pooz zeröck heim kohme, wann se uss_em Schlaachfeld fott jerannt, un affjehoue wohre.

Et weed wall esu sinn, dat de Jrönd för di Name e betzje en Lejänd sin. Jedenfalls hät dä Schriiver dohmohls jejleuf, dat die Shtadt Trier em Johr 2003 för Krestus fun dä Treverer jebout woode wöhr. En Wohrheid eß se öm 16 för Krestus eröm fun de Römer jejröndt woode.

Belder[Ändere · Quelltext bearbeiten]

Websigge[Ändere · Quelltext bearbeiten]