Scheffsschruuvefabrik Ostermann
(mieh kölsche Sigge)
un geschrevve en de Schrievwies vun de Kölsch-Akademie
(mieh Sigge en de Schrievwies vun de Kölsch-Akademie)
De Scheffsschruuvefabrik Ostermann & Co. wor ene Metallbaufirma vum Ihrefeld en Kölle. För einige Zigg wor dat Ungernemme de Maatföhrer beim Aanfäädige vun Scheffsschruuve.
Geschichte
[Ändere · der Quälltäx ändere]De Firma Ostermann & Flüs Woodt em Johr 1890 vun däm Formermeister Gustav Ostermann un däm Kaufmann Wilhelm Flüs en Riehl gegröndt. Dat eeschte Werk wor op de Danziger Freiheit (hückzedags Boltensternstroß). Do woodte op 24.000 Quadratmetere ene Kofferhuhovve, ene Metallhött un ene Raffinerie opgestallt. Aanfangs däte se do vür allem Lagerschale vör dat Ieserbahn-Reparaturwerk en Nippes aanfäädige.[1]
Öm 1900 finge se domet aan, Drevvwelle un Scheffsschruuve met enem Geweech vun bes zo 20 Tonne (dat sin 500 Zentner) us Bronß em Schleuderguss ze maache. 1915 kunnte de Firma de Mendener Drohtwerke üvvernemme. Do han se noh däm Zweite Weltkreeg üvverweegend Köchehääd hergestellt.[2][3]
Dat Werk in Riehl woodt wäge de maue Weetschaff em Johr 1931 zogemaaht. Ävver de Aanfäädigung vun Scheffsschruuve han de Sönn vum Gustav, dä Kurt un dä Hans, em Bayenthal fottgeföhrt. 1937 leefen de Geschäf widder besser, un Ostermann kunnt de Iesergeeßerei Wiedenbrück & Wilms am Gröne Weg op däm Ihrefeld üvvernemme. Do han se och de Setz vun de Firma hin verlaat.[2]
Em Mai 1944 woodt de Geeßerei em Ihrefeld kapodd gebomb un de Ress vun de Aanllage en de Oss verlaat, noh Gartz an de Oder. Do kunnte se ävver nur Propellere vör Schnellboote un Minesöker aanfäädige. Noh däm Kreeg han de Russe dat ganze Werk afmontiert.[2]
Em Ihrefeld woodte noh däm Kreeg un däm Oprüüme vür allem Waffelieser, Lampeständer un andere Huushaldsgeräte gemaaht. Eets en de 1950er Johre gov et widder größere Bedarf an Scheffsschruuve. Esu hätt de Firma Ostermann em Johr 1952 vun de Famillich Wahlen, die och Metbegründer vum Ihrefeld wore, dat Grundstöck an de Leechstroß 25 gekauf. Un 1961 bes 1962 han se do ene große Geeßereihall gebaut. Domet wor et vür de Firma möglich, wirklich große Scheffsschruuve ze maache. Ald em nächste Johr, 1963, hätt de Ostermann de Schruuv vun däm Atomscheff Otto Hahn aangefäädig. Dat Rieseding wor us ene spezielle Bronß, hadd ene Durchmesser vun sechs Meter, un woog 25 Tonne.[2]
1979 ging de größte deutsche Scheffsschruvefirma, Theodor Zeise en Hamburg, bankrott. Nu wor Ostermann de größte Hersteller. Ävver e paar Johr späder hatte se technische Brasel met ene neue Aat vun Zobehör vör Scheffsschruve, de Leiträder. Se verloore düchtig Geld un bovvendrop kom de weltwigge Scheffsbaunud. Se han versök noh Rostock ömzetrecke, ävver dat fluppte schon nit mieh. Am Eng moote se de Firma 1992 opgevve.[2]
Koot fürm Eng han se noch de größte Scheffsschruuv vun ganz Deutschland aangefäädig, met enem Durchmesser vun 10 Metere un 65 Tonne schwer. Zoletz hadd Ostermann em Ihrefeld öm 140 Metarbeider. Dat Gelän woot verklopp un de miehste Baute avgeresse. Nur ene Deil vum Empfang, de Geeßereihall un de Schleifereihall vun 1992 stonn noch un wääde hüch noh enem Ömbau anders genötz.[2]
Booch
[Ändere · der Quälltäx ändere]- Johannes Maubach: Auf den Spuren der alten Ehrenfelder Industrie. Köln: Flock-Druck 2005, Sigge 122-123
Websigge
[Ändere · der Quälltäx ändere]
Woher mer dat wesse
[Ändere · der Quälltäx ändere]- ↑ Joachim Brokmeier: Riehler Geschichte: Schiffspropeller aus Riehl op unser-quartier.de, 8. Februwar 2020, avgeroofe am 20. April 2024.
- ↑ 2,0 2,1 2,2 2,3 2,4 2,5 Anette Essam: Köln Schiffsschraubenfabrik Ostermann Lichtstraße op rheinische-industriekultur.de, avgeroofe am 20. April 2024.
- ↑ Claus-Peter Levermann: Osterflüs und Beckmann produzierten Herde op wp.de, 7. Februwar 2014, avgeroofe am 20. April 2024.