Rheinbach

Uß de Wikipedia

Dä Lemma-Titel he es en de amplische Schrievwies.


Wappe Kaat
Rhingbach Wappe
Hee litt Rhingbaach!
Basisdaten
Bundesland: Nordrhing-Wääßfaale
Rijierungsbezörk: Kölle
Landkrejs: Rhing-Siesh-Krejs
Wie jrooß iss dat? 69,74 km²
Wi vill Lück wohne da? 26.044 (31.12.2002)
Lück pro Kwadraatkillemeter: 373 Lück pro km²
Wie huh lisht dat? 173 m ü. NN
Postleitzahl: 53359
Vüürwahl: 02226
Wo iss dat jenau? 50° 38' n. Br., 6° 57' ö. L.
Autokennzeijshe: SU
Jemeijndeschlüssel: 05 3 82 048
Veedel: 9 Veedel
Adräss vunn dä Stadtverwaltung: Schweigelstr. 23
53359 Rheinbach
Offizielle Website: www.rheinbach.de
E-Mail-Adräss: info@rheinbach.de
Politik
Bürjermeijster: Stefan Raetz CDU
Dä Hexedorm unn en aales Stöck Muur

Rheinbach es en Städtche in dä Vüreijfel, links vumm Rhing. Et iss suh 50 km wäsh vunn Kölle, äwwä liesht mehrstentejls in dä Kölsche Bucht. Henge Rhenbach jeht et rop en de Ejfel, wo och ne Handvull Dörpe li_e, di zur Stadt jehüre. Dat sinn Merzbisch, Nökirsche, Irlebeusch, Schliebisch, Scherbisch un angere, die zosamme „De Sürsch“ jenannt werde. Rhenbach iss ene aale Stadt unn hätt en mittelalterlishe Befestijungsanlaach. Eäß noo dem zwejte Weltkriesh sinn böhmische Jlaaßblääsä noo Rhenbach jekomme. Se hänn dat Städtsche zo enem Zentrum vunn dä Jlaaßbläsäkunz jemaat. Hück iss ene Jlaaßfachschull in Rhenbach, wo mer Jlaaßbloose, Jlaaßmoole, Jlaaßschliefe un ander Jlaaßkünßte liehre kann. De Liehrlinge vun dä Sholl rühme zick Johre Johr för Johr de mietßte Preise för de beßßten Affshlußarbejde von Norddeutshland af. Ußßerdämm hätt Rhenbach e berüümp Glaaßmuseum.

En Rhenbach es ene Bahnhoff und nit esu wigg vun do, et Jefängniß. Do hätt enen prominenten Kääl jesessen, dämm Willy Brandt singen Kanzlerampsspion Günter Guillaume.

Op dämm Stadtjebiet vunn Rhenbach in der Nöh von dämm Dörpsche Wormersdorf liesht och de aale Tomburch. Un nit wick von do — kam_mer von bovve vun dä Bursh joot sinn — en jrooße Antennenaanlach, wommit de Bönnsche Astronoome in der Weltenruum erin horsche un luure.

Medden in Rhenbach kammer en janz Deel historisch Muure, Hüser un Törm beluure. Et äälste is en Stöck Waßßerleidung vun der Römer. Die leef in de eetste Johre vun der chrißliche Zeitreschnung von der Ejfel beß erunger aan der Rhing noo Kölle erin.

Karnevalsjeschishtlisch sät me en Rhenbach Alaaf. Karnevalistisch jitt_et no_ene Bruuch, dänn de Rhenbacher angers verstonn wie de Kölsche: de Erstürmung vum Raadhuus dorsh de Funke. Dat woor fröher en Verhohnepiepelung vum Preußße sing Militär. Äwwä in Rhenbach iss_et Militär selvß dobeij. Aan Wieverfaaßnaach träkke de Stadtzaldate dorsch de Stadt unn donn et Rathuus belaaren. De Bundeswähr hülf noo Kräfte met ene falsche Panzer unn MJ-Feuer met Platzpatrone. Dä Bürjermeister jitt dän Rathuusschlüssel singe eijne Soldate, nit dä Funke. De Kölsche finge suh_jätt komish.

Zo dänne bekannteste Jonge us Rhenbach jehüürt secher dä Wolfjang Niedecken, dä zwar en Kölle jebore wood, dä ävver en janze Zick lang en Schull en Rhenbach besöök hätt. Späder wood hä als Mussiker met senger Bänd BAP en janz Dütschland berüümp.