Keiserin-Theophanu-Schull
De Keiserin-Theophanu-Schull (och „KTS“ jenöömp) es e Jymnasium (dat dä Stadt hööt) en Kalk (Veedel vun Kölle). Et es, wie och en de mihste ander Jymnasië jängig, dat ene Ovverstuv op dä eine Sick un ene Meddel- un Ungerstuv op dä ander Sick ze finge sin (huhjestoche säht mer doför Sekundarstufe I/II). Die Schull hät usserdäm ene Förderverein, för Jeldfrore ze räjele, un es ene Janzdaachsschull, dat heiß, dat de Pänz off bes 15 Uhr noch em Ungerreech sin.
Histörche
[Ändere · der Quälltäx ändere]Vürjescheech
[Ändere · der Quälltäx ändere]Em Johr 1898 hät mer en Kalk en „Liebfrauen-Oberlyzeum der Schwestern vom armen Kinde Jesu“ opjemaht, wat esu vill wie „Marie-Mädcherschull vun dä Söstere vum ärme Panz Jeses“ heiß (Marie es hee däm Jeses sing Mann). Wat dä Name hee aandügg, stemmp och, de Schull wor streng katholisch. De Nazis han am 30. März 1938 de Schull jeschlosse.
En dä Kantstroß jov et bes 1938 en Jymnasium, ävver eckersch för Junge. Och dat hee woodt opjelüs, doch dä Bou blevv bestonn, esu dat dä en en Mädcherschull ömjewandelt wääde kunnt („Städtische Oberschule für Mädchen“). De mihste Mädcherklasse, die do entroke, kome tireck us dä Marie-Mädcheschull. De Schull maht am 01.04.1938 op (keine Wetz!) un dä eeschte Rektor wor dä Edmund Hahn. 212 Mädcher jinge zo dä Zick op die Schull.
Do et ene Mädcherschull wor, moote de äldeste Schülerinne 1939 nit noh der Kreechsfront, doför hät mer se noh'm RAD (Richsarbeidsdeens) jescheck. 1941 woodt dä Josef Meyer Rektor
1943 wore esu vill Röym wäje dä Firma Klöckner-Humboldt besatz, dat der Ungereech en et Jungejymnasium en Düx verlaht woodt. Weil dä Kreech emmer schlemmer woodt, hät mer em Oktober 1944 all Schulle flöck zojemaht. Do hatt mer am Anschloss dann all Schülerinne un Lehrer zor Hölp avkommandeet. Koot vür'm Kreechsengk, am 3. März 1945 storv dä Josef Meyer bei enem Loochaanjreff.
Wie dä Kreech vürbei wor, hät mer e paar Mond späder widder me'm Ungereechte aanjefange. De Schull nannt sich „Studienanstalt Köln-Kalk“, se befung sich ävver zoëehts en Merrem (Dat Merrem op dä Schäl Sick, versteiht sich...). Dä nöye Rektor heeß Otto Freud.
Aan Pooschte em Johr 1948 kom mer widder zeröck noh Kalk en de Kantstroß, wo ens alles aanjefange hät.
Weil et emmer mih Schülerinne jov, ävver nit mih Röym, hät mer dä Ungereech och an janz ander Oote, för e Beispill en verscheede Jasshüüser ov en enem Jurendheim, avjehalde.
Keiserin-Theophanu-Schull
[Ändere · der Quälltäx ändere]Am 2. Juli 1957 hät sich de Schull en „Keiserin-Theophanu-Schull“ ömjedöyv. Se es noh dä Keiserin Theophanu benöömp, dat wor domols em Meddelalder en mächtije kreechische Herrscherin, die en Kölle, en dä Kirch Zint Pantalijun bejrave es. Em selve Johr kunnt mer schleeßlich dä B-Trak betrecke. Vun 1959 bes 1963 hät mer dä A-Trak ömjebout un en Turnhall opjestallt.
Et Schulljohr 1973/74 wor en jroße Zäsur för de KTS, weil av do och Junge de Schull besöke kunnte. Vun 1974-1975 hät mer e paar „Container“ un dä C-Trak ereech. E wigger jroße Schredd kom 1978/79, wie dä Samsdaach schullfrei woodt. Zick 1983 fingk koot vür dä Sommerferië de Projektwoch statt.
Rektore
[Ändere · der Quälltäx ändere]| Rektor | Em Amp |
|---|---|
| Edmund Hahn | 01.04.1938–1941 |
| Josef Meyer | 1941– 03.03.1945 |
| Otto Freund | 11/1945–31.03.1952 |
| Rose Olbrich | 01.04.1952–31.12.1955 |
| Franziska Hermann | 01.01.1956–16.01.1968 |
| Heinz Lemmer | 17.01.1968–17.11.1968 |
| Maria Vordieck | 18.11.1968–31.07.1987 |
| Winand Breuer | 10.09.1987–03.07.2001 |
| Monika Lindberg | 04.07.2001–28.01.2016 |
| Oliver Schmitz | 29.01.2016– 24.06.2022 |
Expansion vun der KTS
[Ändere · der Quälltäx ändere]Em Johr 1998 hät de Stadt beschlosse, dat de KTS expandeere soll. Dat Janze wood dann 2009 konkret, dann do stundt fass, dat mer en Dreifachsporthall un noch ene Trak boue weed. Eijentlich sollt dat Dingen em Schulljohr 2018/19 fäädig sin, ävver weil mer en Kölle sin un alles jet duurt, kunnt mer ehts em Hervs 2020 dä Aanbou opmaache. Mer weiß jrad nit, wat mer mem A- un B-Trak maache soll, die ad ahl sin; et weed üvverlaht, se ze renoveere ov avzerieße. Em selve Johr hät mer dä C-Trak un de ahl Turnhall plattjemaht, för Platz ze schaffe.
Schullprofil
[Ändere · der Quälltäx ändere]De Schull bekennt sich, weil janz vill Imis op de Schull jonn bzw. dä ehre Pänz ov Enkele, un mer hee esu op verscheede Kulture un Ethnië treffe kann, zor Toleranz jäjeüvver ander Lück, janz jlich, wat för en Huckfärv, Jlöyv ov sexuell Usreechtung mer hät. Mer hät och verscheede Fahne, för e Beispill en Anti-Rassismus- un en Rähnborefahn, opjehange, för ze zeije, dat mer die Wäät hee vertredd.
Nevve Ängelsch, Lating un Franzüsch ka'mer och Spansch un Japansch liere. Mer hät Japansch zem Schullfaach jemaht, wie noh'm Äädbevve 2011 un dä späder Atomkatastroph en Japan Schüler en de KTS opjenomme woode.
En Tradition es ene Sponsorelouf, dä jörhlich stattfingk, för ärm Lück en Bangladesch ze helfe. Dat weed en Kooperation met däm Benefizverein „Lichtbrücke“ jemaht. Usserdäm mäht mer, och jöhrlich, bei „Jurend debateet“ un ener Aktion vum DLR met. E paar Schüler sin KVB-Fahrzöychbejleiter.
Mer mäht och beim „Studienkompass“ vun der „Stiftung der Deutschen Wirtschaft“ met.
Prominent Schüler
[Ändere · der Quälltäx ändere]- Berivan Aymaz, Politikerin bei de Jröne, hät 1990 Abitur jemaht
Netzsigge
[Ändere · der Quälltäx ändere]- Netzsick vun der KTS