Militärisch Sendestation vun Pierre-sur-Haute

Uß de Wikipedia
Sendestation Pierre-sur-Haute - zivile Sendemass in der Medde, reärts zwei Maste vum Kommiss, dröm eröm Baute vür et Personal

De militärisch Sendestation vun Pierre-sur-Haute es en hondertzwanzich Morjen (drissich Hektar) jruß Anlaach en Frankreich, die füür dä Funkverkehr vum Kommiss in Frankreich und dä NATO jenutz weed. De Station hät singe Name vun däm Bersch Pierre-sur-Haute (1631 m huh), op däm se steht, wat jenau op der Jrenz vun de französische Rejione Auvergne und Rhone-Alpes is. De Station weed deils och vun zivile Stelle jenutz.

Geschesch[Ändere · Quelltext bearbeiten]

De Station wood em Johr 1913 opjemaat, für ene optische Telejraf, wat äwwer e janz kleen Anlach wor mit nur winnisch Personal. Em Kaale Kreech hät die NATO beim fränzösische Staat aanjefrach, ob se nit bei ihrem Projek ACE High mitarbeide will. Dat es en Funknetz vun letztlich 82 Statione vum Nordkap in Norweje bes in de Türkei, wat uch dann noch funkzioniere sullt, wänn et bei nem Atomkrieg de Kurzwelle nit mieh donn. 1961 wood die Station dann jebaut. 1988 hät die NATO dat ACE High usser Betrieb jesatz, ävver dä fränzosische Kommiss kunnt die Station für angere Saache bruche, für alle Dinge vüür de Luffflott. Se hätt jetz uch en Radar.

Ene jruße Deil vun der Station is ungerirdisch und stärk jeje ABC-Waffe geschötz.

Ärjer met de Wikkipedija[Ändere · Quelltext bearbeiten]

En de französische Wikkipedija jov et sick 2009 en Sigg övver de Station, met der wor an un für sich nit vill loss. Em Määz 2013 hät dann dat französische Geheimdeens-Amp DCRI(Direction Centrale du Renseignement Intérieur) de Wikimedia Foundation kontaktiert un jesacht, se mööte de Sigg lösche, weil do jeheime Anjabe drop stönde. Wikimedia hät jeantwoodt, dat de Informatione op dä Sick us alljemein zöjänglische Quelle kumme däte un de DCRI sollt doch ens sare, wat für Details oder Afschnedde se jenau stüre däte. Et kom ävver kein Antwort. Statt desse han se ene französische Wikkipedija-Köbes (Admin) aanjejange, dä met der Sach jar nix ze donn jehatt hät un en esu lang molestiert, bis dat er die Sigg jelösch hätt. Kurt drop wood die Sach bekannt, die Sigg wood weder neu anjelaat, in vill angere Wikkipedija övversatz und de Ziedunge in Frankreich un angerschwo hann drövver jeschrivve.