Kessenech

Kessenech es e Stadtvierdel vun Bonn. Vun de Bonner Innestadt us litt et e bessje nohm Söde, et es do ävve nit wigg vun weg. Zom Beispill ka'me do vum Bahnhoff, wa'me de Linich 62 odde 61 nimmp, en e paar Minutte henfahre. Kessenech jrenz aan de Södstadt, aan Poppelsdörp, aan Dottendörp un aan de Jronau. Wa'me en Kessenich noh Westen deet lure, sitt me de Bösch un de Venusbirch.

En Kessenech jit et vill kleen Weetschafte un Restorangs, aal Jässje un och e paar Siedlunge, un et es ensjesamp janz jemötlich. En Kessenech hann se och ene Foßball-Vereen un dat es Fortuna Bonn. De Fortuna spillt em Wasserland. Dat höt sich zoirz aan wie e Schwemmbad, es et ävve nit, sondern dat wor fröher e Sumpfjebiet, dat hät me drüchjelaat un do steht jetz att lang en jruß Sport-Aanlaach. En Kessenech jit et och en janze Reih Kirche, Schulle un Jeschäftche, wat esu alles zo nem aanständije Veedel dobeijehöt.

De Hans Riegel sen. hät 1922 en Kessenech de Jummibärche erfunge un dann aanjefange, unge däm Nam HARIBO (HAns RIegel BOnn) Sößichkeete herzestelle. De Haupsetz vun dä bekannte Firma es hügg emme noch en Kessenech. Do dunn vill Lügg en Arbeed finge, un fröhe woren et er noch mieh. En de Stroße, die öm de HARIBO erömlijje, kütt et vür, dat et nommedaachs ens e bessje fies noh Lakritz un Schemikalien rüch. Nor wie dat su es: wa'me sich do irz ens draan jewönnt hät, kritt me vun däm Jestank jrad su e deef, hätzlich Jeföhl.

Die Kesseneche senn op alle Fäll stolz op ehr Veedel. Doröm jit et do eene, dä verkööf schwatze Ti-Schörts, wo'r e met Wieß dropjedruck hät: "Kessenich ist Kult!" (Dat heeß op Platt "Kessenech es Kult", ävve dat versteht me jo.)