Schloss Bänsberch

Uß de Wikipedia
Zur Navigation springen Zur Suche springen
Hee die Sigg es op Kölsch
(mih kölsche Sigge)
un jeschrevve wie beim Wrede oder bei der Akademie för uns kölsche Sproch
(mih Sigge jeschrevve wie beim Wrede oder bei der Akademie för uns kölsche Sproch)
Bänsberch, Rothuus un Schloss

Schloss Bänsberch litt em Veedel vun Bänsberch vun dä Stadt Berjisch Jladbach em Berjische Land.

Johann Wilhelm II. wor Herzooch vun Jülich un Berch vun 1679 bes 1716. He es bei dänne Lück als Jan Wellem en Erennerung jeblevve. Sing Residenz hatt'e en Düsseldorf. Noh Bänsberch kom he allemolde em Hervs. Em benohberte Könichsfors jing he et leevs op Jach. Sing Frau, dat Anna Maria Luisa, wor janz bejeistert vun däm herrliche Bleck op et hüjelije Berjische Land. Die Aussich dät se an ehr Heimat, de Toskana, erinnere.

Nit zoletz öm singer Frau en Freud zo maache, hät dä Jan Wellem dat neue Bänsberjer Schloss baue losse. Singe Architek Jraaf Matteo d'Alberti hät dat Barockschloss jenau op dr Kölner Dom usjerich, su dat dä Jan Wellem vun Bänsberch us en prima Aussich op dr Dom hatt. 1711 woren de Wäng un et Daach fäädich. För dat Interieur ze sorje hatte renommeete Künsler wie Antonio Belluci, Antonio Pellegrini, Jan Weenix un Dornenico Zanetti.

Jan Wellen es 1716 jestorve. Do wor dat Schloss noch nit fäädich. Die Monarche, die hinger em kome, hät dat Schloss nit besonders interesseet.

Alle naslang jov et dan andere Lück, die en däm Schloss sich breid jemaat han. Dat Jebäude wor Lazarett, Apotheek, Preußische Kadettenanstalt, Kasern, Schull un Internaat.

1997 han se dat Schloss renoveet un e Hotel druss jemaat. Dat es hückzedaachs en janz fing Adress, wo mer fürslich esse un drinke un üvvernaachte kann.

Vun 2002 bes 2005 wood em Schloss Bänsberch dä Grimme Online Award verjovve. Bei de Foßballweltmeisterschaff 2006 wor de Foßballmannschaff vun Südkorea em Schloss ungerjebraat.

Websigge[Ändere · der Quälltäx ändere]