Flashmob

Uß de Wikipedia

Dat Woot Fläshmop küdd_ussem_änglish fun Amärrika zo unß. Do häjs_et flashmob fun flash, dä Blez, un mob, dä Pöbel, ävver orr_enne Minsche_Knubbel, dä Radau määt.

Enne Flashmob weed orjanisėeet, fö jewöönlijj_övver Weblogß, Newsgroupß, Fläshmop_Wikkieß oddo e-Mail-Kette, un dann ann_ennem fürher beshtemmpte Plaz affjehallde.

För Aanungßlooß Lück, di do erömshtonn, süüt dat esu uß, allß wi wenn sijj_enne jruuße Aanzal Minnsche obb_en jehäjmißvolle Aat ob_äjnmoohl äjnish sinn, dat_se all_et sellve důnn un sijj_ejaal forhallde. Wat_se donn_eß janns_öff jät koomishet. Oohne Jrund op äjnmool Bäjfall klatsche för zwäj Menutte, oddor_e Leed senge, all mem Hänndi am lenke Uur met de Shweejemotte övver ruute Ruuse schwaade un dorbäj övverm_Kopp met de rääshte hannd_en de Luvv_eröm_fuchtelle, su jät.

Esu_enne Fläshmob eß nommal flöck widdo_föerbäj, un_di Lücksher jonn ööhnzwohen, allß wi wänn nix jewääse wööh.

Aanjevange hädd_et em Amiland, un övver_en Kunns Akzjoohn en New York City en USA em Juni 2003 met allorläj Medije Äsho koohm en jannze Wäll fun Flashmopß flögk noh Europa erövver_jeschwapp. En alle jröößere Shtädd_un Mettropoole joov_ed_se, Koppenhaaren, en Züerish, Rom, Atteen, Wien, Bällin, en Düßßeldorv_un Kölle, dä Shtadt Münßtor.

Och wänn di Wäll flögk widdor noohleeß, joov_et doch norre_paa ingernazjonaale Fläshmops fordäjld_op ungerscheedlijje ööt en de Wääldt, wi_jo_m 25. Oktoober 2003 unn_o_m 18. Juuni 2004.

Enzwesche hann och Firrme dat Flashmobbing för sijj_äntdägg_unn mache Reklame domed_un dofüür: Am 9. Dezember 2005 um 13:06 Uur (MEZ) hät dä Färnsee_Sändor Eurosport med Swatch en ettlijje Jruuß_Städd_en Europa Flashmopß orrjaniseet, wääje enne Ußloosung för de Fooßball_Wääldt Mäjsorschaff fun_de FIFA.

Websigge[Ändere · Quelltext bearbeiten]